Aaj Tum Nahin Aaye ...

aaj tum nahi aaye...

na jane kyun... par aaj tum nahin aaye,

kai lamhe raakh hue intezaar me,

jaane kitne khwaab gawaye maine...

par aaj tum nahin aaye...

aakhon ko zara neend si lagi , malte malte jagaye rakkha,

hasrat se takkta raha wo veeran khidki, // (hasrat = longing)

Uspe jami dhundh paari se hatata raha... // (paari se = periodically)

par aaj tum nahin aaye...

jo hoti koi dastak to bechain ho padta, kisi chetna ke sath

khidki ke har kone me tumhari parchai dhoondhta rehta,

aaj bhule bisre kisi dost ne di dastak, kiya yaad...

par aaj tum nahi aaye...

doston ne bujha di battiyan, kaha so jaa,

par ek mombatti jalake maine barkaraar rakhi roshni,

parwane kai jal gye shama ke sparsh se, hum bhi taiyyar baithe the... // (parwane=flies)

par aaj tum nahi aaye...

choti choti jhapkiyan maari, tumhari kuch jhalkiyan

batori toote toote khwabon me,

har khwaab adhoora hi tod diya,

tumhe poora pooral dekhne ki chah me...

par aaj tum nahin aaye...

na jane kab ye kambakht neend das gayi,

kab nazar laparwah hui, kab mombatti pighal gayi...

neend ki chaadar jo aadhi raat gaye sarki, mai sehsa jhatpataya,

uthkar dekha to khidki ke sheeshe khule the ab bhi...

laprwahi par kuch chidh gaya khud se, kuch darr gaya zara

poocha khuli khidki se - "kahin wo aakar chali to nahin gayi?"....

kya aaj tum nahin aaye ?

............

khwabon ka dank ...

roz chali aati ho, dabe-panv mere bistar pe,

na koi aahat, na koi dastak,

badi chalak ho.. payal bhi nahin pehnti,

koi bandish pasand nahin tumhe,

sarhadon ke bare me bhi kabhi suna hai ?

badi besharm ho.. har raat aa jati ho,

sarak jati ho mere chadar me, aur jakad leti ho mujhe... kass ke,

mano iss raat ke baaz nazar se koi darr nahin tumhe,

darrogi bhi kyun?..

raat pighalte subah na jane kiss duniya me gum ho jati ho,

hamari duniya me aankhen kholti to jaan leti...

jaan leti ke raat ki ye khumari, kitni khatarnak hai.

tum toh kandhon par pank laga deti ho,

uddne ko bebas karti ho,

tum kya jaano ke yahan aasman par bhi hadhen bichi hui hain,

hamari duniya shiddat ki duniya hai, kashmakash ki duniya hai,

yahan sarhadein bhi hain aur bandishen bhi,

hum apni khidkiyon par parde lagate hain,

hamare yahan darwaze hain, jo sabke lie nahin khulte,

uddne ki ijaazat nahin humen,

par tezi ke bagair kam nahin chalta,

jhak marke daudna hi padta hai.

issi daud se kuch pal churakar aa girta hun iss bistar pe,

yahin milta hun tumse.. iss raat ke jungle me,

issi raat ka hissa ho tum,

issi ki tarah bekarar aur zehreeli,

roz zara sa zeher aur pila jati ho,

par sach kahun to.. zeher ke ghoot pilakar hi sahi,

mujhe zindagi tum hi deti ho,

roz chali aati ho, dabe-panv mere bistar pe,

aur khwabon ka dank marrti ho... ...

kal ki tareh ...

kai dino bad kuchh likha hun, ummeed hai aapko pasand aaye ...

aaj kai dino baad dhoop giri iss khidki par,

par kash isspar phirr barish ki wahi barsaat ho jaye,

han, sheeshe ke uss paar nazare zara dhundhle ho jayenge .. kal ki tareh

lekin kya pata shayad sheeshe ke iss par, phirr tumhara sir mere kandhe par ho... kal ki tareh !